30日挑戰:大帽山睇日出

我嘅人生,我自已決定 !

琴日天氣本身已經唔係幾好,原先約咗兩位爬山攝影專家同我地一齊去,但之後佢哋話好大可能會因為天氣差而睇唔到日出,好可能會食白果,建議我哋改時間。

但我一直以來都相信,如果我有試,都仲會有1%嘅可能會睇到,相反我唔試,成功嘅機率就一定系 0%。

況且,都約咗朋友,凌晨半夜又冇乜其他野更值得做(瞓覺? ),咁不如試吓、探險下,我覺得比我攤喺床上訓一晚更好。

約咗三點九喺荃灣麥當勞等,接埋個朋友就坐的士上大帽山(我做咗少少research,知道坐的士上到去後,都要行大約45分鐘)。

的士到達後,一落車,嗰種震撼嘅感覺,好似入咗套鬼片入面咁。

係一架車、一個人、一盞燈都無,基本上係乜都冇,當晚亦超級大霧,用咗電筒,都睇唔到 20 cm以外嘅嘢,感覺勁似 Mist 果套戲。

隔離個女仔朋友已經超驚(但我覺得佢因為面子問題 — (佢好要面,乜都要贏),講唔出「不如我哋放棄,走啦!」),因為從來無上過去、又乜嘢都睇唔到、又唔知道終點其實係咩樣、只可以計時咁行上去,估大約行咗幾多。

上到去好彩認得個雷達站,就知道我哋到咗,等咗兩個幾鐘去到天都光埋,都係乜都睇唔到,淨係睇到啲霧氣…

走嘅時候,亦好自然咁順路諗住繼續行下山,行到一半大約45分鐘先發覺行錯路,覺得按原路走返落山好似會穩陣啲,決定重新回頭再走過。到最後八點半先落到山… 足足行左接近五個鐘…

(最後個女仔亦嬲咗我,唔係因為我冇乜準備咁上去,而係因為我一路行一路講鬼故… )

Anyway, 呢個故事教訓我,有啲時候都係聽專家講會好啲。因為其實我一直以來都習慣係唔會直接盲目相信任何人、事情或規則 (無論係由專家、父母、書籍等所講),所有事情我都會諗一諗,睇吓make唔make sense,或親自試一試(當然冇後果嘅野先會做,好似今晚咁,去左亦唔會有咩後果,當同朋友行下山、吹下水,幾開心)。

都係希望分享比大家嘅一件事:任何傳統社會所講嘅事,係咪一定啱呢?例如放假一定要去旅行先至叫做放假享受?讀完中學,就一定要升上大學,之後再繼續努力讀書搵份好工?40歲前就一定要結婚?結咗婚就一定要生兒育女?

究竟大家真係真心覺得以上嘅都係自已必要,定係社會同我地講係必要—所以我地就盲目去跟?可以好好諗一下。

如果我有跟傳統社會所講嘅事去做,我今日亦唔會有機會同大家分享我嘅故事。

因為我相信如同,Steve Job 一個非常精彩嘅廣告所講:

Because the people who are crazy enough to think they can change the world are the ones who do.

從來冇一個人係跟從傳統規則而可以改變世界;真正改變世界嘅人,都係將規則重新改寫。你呢?

大帽山睇日出1 大帽山睇日出2 大帽山睇日出3

 

Felix Wong 王嘉裕
Written by Felix Wong 王嘉裕
90後創業家、作家、文匯報專欄作家、英國 Warwick 法律系學士、香港大學犯罪學碩士 、RED EARTH 集團創辦人,公司旗下超過 20 個成功項目。