續上篇講寫日記嘅好處，寫日記除左提高抗壓能力，將抽象嘅想法具體化同埋令思路更清晰外，其實仲有以下2點……

4. 促進個人進步 Improvement

講到寫日記，基本上其實你寫乜嘢都得，但我自己個人而言，每日我都會寫自己學到啲乜、有啲咩可以進步、有啲咩錯唔應該再犯、去確保自己好似電影「機密真相」所講：「一個人唔可能犯兩次同樣嘅錯誤。第一次係犯錯，第二次就係你個人選擇。」

如果唔寫低嘅話，你可能兩三日後連犯嗰啲咩錯都已經完全唔記得；相反，如果你寫低咗嘅話 — 係你寫低嘅過程，你會不知不覺咁記低左件事，減低…下次犯錯嘅機會。

一個簡單嘅例子：假設你覺得開心係最重要，但宜家做緊果份工又唔點比到開心你。你已經做咗三年，去到第四年嘅時候，你問你自己：我係咪應該辭職搵過第二份工？

呢個時候你可能會話：「其實我身邊嘅同事咪又係咁做，諗返轉頭其實都冇乜嘢姐，算啦，繼續做落去安安穩穩咁過日子咪幾好。」

但係如果你有寫日記嘅習慣，你唔會無視左過去果三年其實每一日都係做緊一份自己唔鍾意、令到自己唔開心嘅工。寫日記會令你睇到曬成個局面，了解自己過去嘅心路歷程，促使你以理性做選擇，而唔係單單憑着當下嘅情緒去做決定。

同一個道理，調返轉亦都apply，假設你做緊一份好開心、亦都係你好鍾意嘅工作，但係有一日好唔開心，你寫嘅日記會令你重溫過去工作嘅快樂和得著，亦會提醒你唔好衝動做決定。

5. 記錄每一年嘅發展
上一年已經過去，問一下你自己：過去嗰一年你做過啲咩事？好多時候如果你唔寫低嘅話，每一年都會好似瞬間飛逝，而你回望轉頭嘅時候，亦唔知道自己究竟做過啲乜嘢。

之前睇過一句說話：「If your life is worth living, it is worth recording.」（如果你的人生活得有意義，它是值得被記錄下來。）

其實之前我都唔明白點解要寫日記，覺得嘥時間、又寫得唔好睇，為咗啲咩呢？但慢慢培養寫日記嘅習慣後，宜家每一日真係唔寫唔得。

所以我習慣每一日開始工作都會開個 Word 檔，先寫兩句嗰日希望做到嘅事，而之後一路工作、一諗到啲咩、睇到啲咩、就即刻記錄入去，哪怕係寫一兩句都好。

咁樣寫日記基本上完全唔會嘥時間，亦唔會覺得有壓力。寫到之後你習慣咗嘅時候，我相信你就會每晚花五分鐘去睇同重整自己寫低嘅野，令到當日嘅日記更完整。

寫日記其實真係好容易，心動不如行動。幾個月之後你會發覺到自己原來經歷咗咁多，睇返會反思或者會心微笑。唔好諗啦，依家即刻寫返幾句啦！