呢一件事，其實自我四月初想做今次30日挑戰開始，我每食一間餐廳都會留意一下佢哋嘅食物、服務質素，有冇邊間我係打從心底想留低啲貼士作為多謝佢哋嘅小小心意，同埋當係對佢哋嘅小小支持同奬勵。

上個禮拜，去到呢間餐廳，由一開始…個侍應已經笑面迎人，好有禮貌咁帶我同朋友到我哋張枱，之後就算我哋有問佢哋借紙借筆，佢地都面帶笑容，唔介意行嚟行去去拎俾我哋。我雖然唔好肯定話佢地熱愛自己份工，但佢地真係用個心對待每一個客人，而呢一點我覺得係香港來講其實係非常難得。

食物來講，亦睇得出廚師好有心機整，好似我哋叫咗一份Caesar Salad ，佢係完整成棵菜排返出嚟，仲好細心咁確保啲沙律醬沾到成棵菜，最後食咗幾樣野2 個人埋單都係五六百。

呢間餐廳無論係環境、服務、食物質素我都覺得真係唔錯，所以去到最後就寫咗一張Notes 連埋＄1000紙幣俾咗佢哋，希望啲侍應睇到，會令佢哋嗰日更開心，最重要係令佢地知道食客會真係欣賞佢哋嘅服務同食物，令佢哋繼續維持呢個良好嘅服務態度。

好多時候，話唔定我地做嘅一啲小事，已經會令到其他人開心。學識欣賞，適時表達自己的謝意，除左係對他人嘅一個肯定，我地一個小小嘅行為仲會鼓舞到別人，咁又何樂而不為呢？

如果想知道餐廳資料的話，可以留言或PM我。