番外篇「創業思維：奧巴馬嘅生活習慣」

美國總統奧巴馬：自己孤獨的時間

大家有冇試過想做一啲事，但係無見到其他人做、或者冇人成功做過，所以就冇鼓起到勇氣去做？

其實寫呢一篇嘅原因係見到奧巴馬嘅生活習慣，就令到我鼓起勇氣，重新調整一下自己嘅生活、時間、習慣，亦都希望大家…可能睇到呢一篇之後，都會鼓起勇氣改變自己生活習慣。

諗一下自已：放工嘅時間係幾點？六點？或者應該問每日會工作幾多個鐘？八個鐘？

點解咁問呢？因為我相信：「如果我做嘅嘢同其他人做嘅一模一樣，係唔 make sense 我會有同其他人唔同嘅結果。」

而每個人，人生入邊都有唔同嘅目標、方向、想擁有嘅結果，假設你嘅目標係想成為一個好似奧巴馬咁偉大嘅領袖、咁嘅「成功人士」（相信應該冇乜人會否定奧巴馬算係成功），咁基本上你就要預咗自己付出嘅精神、時間、努力，會同奧巴馬非常接近。

每一晚奧巴馬係六點半同屋企人食飯之後就會自己一個返去白宮入面嘅私人辦公室，自己一個去低頭思考、工作，做到大概一至兩點，如果之後一兩日有演講，做到四五點亦都一啲都唔出奇，係任期內（連續好幾年）都唔訓超過五個鐘。

好多時候，我哋習以為常覺得六點就係放工嘅時間，但對於奧巴馬來講，七點食完飯先係開始工作嘅時候。

對於奧巴馬黎講，每一晚嘅四五個鐘頭獨處時間係非常重要，因為每一日嘅工作都非常繁忙，唔可能日頭時間可以block到半個鐘出嚟，如果夜晚冇呢幾個鐘嘅時間，啲嘢係冇可能做得完。

大部份創業、企業家，其實都可以係奧巴馬身上學到兩點：

第一，每一日都必須要有三個小時或以上獨處嘅時間，好好你自己可以專注思考、工作。

第二，了解到自己目標後，搵返已經做到你目標嘅人，參考一下佢哋嘅生活習慣、工作模式，如果佢哋每日都要至少工作14小時，你想達到佢嘅結果，要付出一樣或更多係理所當然。

其實有好多人問我點解五點起身？呢一個亦係我每日五點鐘起身嘅其中一個原因，因為可以比我自己做完運動，由七點去到十點自己一個係係同事未返之前，係公司獨處好好思考一下同專注工作。

希望大家（特別係想創業嘅人）睇完呢一篇之後，可以好好設定一下自己日後想成為一個點樣嘅人、自己嘅目標係咩。不妨而家好好諗一下，參考一下以達到你目標嘅人嘅生活習慣，再調節一下自己嘅生活習慣啦。

New York Times 報導 奧巴馬嘅生活習慣 :  Link 

Photo Credit: Everett Collection / Shutterstock.com