一直以來，家人都係我嘅Priority，努力讀書同埋工作，其實都係希望比一個交代佢哋，但係突然之間回顧返過去24年，佢哋無私地為我付出，作為兒子嘅我又為佢哋付出左啲咩呢？

所以今次想藉住呢個100個人生必須做嘅挑戰，同家人講一聲多謝，比一個開心嘅驚喜佢哋，作為對佢哋嘅感謝。

而最近我媽咪同親戚就去咗日本慶祝生日…

但因為我工作實在太忙，冇時間陪到佢去，咁我就諗下有啲咩驚喜可以比佢呢？

事前知道佢係凌晨1點返到香港，我之前問佢洗唔洗接佢，佢拒絕左，因為佢知道我聽朝要五點起身返工，仲話自己一個坐的士更方便，我亦答佢冇問題。

其實我已經買左一大束花去機場接佢，夜晚9點幾同朋友食完飯已經揸車去機場，10點去到機場望住塊board，先發覺佢班機delay到兩點幾，距離而家仲有成四個幾鐘，夠我返屋企再來回幾次。

當時真係好有衝動想返屋企瞓覺就算（因為每日五點幾起身，每逢夜晚11點已經好眼瞓），覺得工作雖然重要，但家人嘅快樂更重要，就算聽朝冇精神返工一日都係值得嘅。

終於等到佢落機，媽咪打俾我話佢安全到達，我仲扮晒野話：「好啦，咁你自己小心啦，我訓先啦。」

佢拎完行李出嚟見到我，佢好開心。而我見到媽咪面上嘅笑容，已經覺得好值得。

其實一直以來，家人都無條件咁對我哋付出，對上一次我哋真心同屋企人講聲多謝又係幾時？對上一次去做一件事令到屋企人開心又係幾時？

不如今個周末，買束花／禮物比屋企人，或者靜靜地咁陪屋企人睇下電視、傾吓計(但唔好玩手機喎)，或者約佢哋去高級餐廳食餐飯啦。咁樣簡簡單單，其實佢地已經會好開心。

唔好令自己將來後悔，珍惜身邊嘅人。

In the end, we only regret the action we didn’t take.